Ռուսաստանի կառավարությունը պատկան մարմիններին հանձնարարել է ապահովել հացահատիկով բեռնված բեռնատարների անցումը Հայաստան։

Դա պետք է իրականացվի «Վերին Լարս» անցակետով, իսկ Վրաստանի ռազմական մայրուղում, ինչպես հայտնի է, սելավների պատճառով դադարեցվել էր երթևեկությունը, այնուհետև՝ վերսկսվել:

«Հայաստանի խնդրանքով Ռուսաստանի Դաշնության իրավասու մարմիններին հանձնարարվել է լրացուցիչ միջոցներ ձեռնարկել՝ «Վերին Լարսի» միջոցով Ռուսաստանից Հայաստանի Հանրապետություն հացահատիկով բեռնատար մեքենաների անցումը կազմակերպելու համար, որոնց երթևեկությունը սահմանափակվել է վատ եղանակի և սելավի պատճառով։ Ջանք ենք գործադրում նվազագույնի հասցնել Հայաստանին անհրաժեշտ հացահատիկի մատակարարման ուշացումները»,- լրագրողներին հայտնել է ՌԴ փոխվարչապետ Ալեքսեյ Օվերչուկը։