ՀՀ վարչապետի տիկին և «Իմ քայլը» հիմնադրամի գործադիր տնօրեն Աննա Հակոբյանը սեպտեմբերի 22-ին Պեկինում՝ China World հյուրանոցի հանդիսավոր սրահում, մասնակցել է ՀՀ անկախության տոնին նվիրված պաշտոնական միջոցառմանը, որը կազմակերպվել է Չինաստանի Ժողովրդական Հանրապետությունում Հայաստանի Հանրապետության դեսպանության կողմից։

Մինչ միջոցառման մեկնարկը, տիկին Հակոբյանին ողջունել են ՀՀ արտակարգ և լիազոր դեսպան Վահե Գևորգյանը և ՉԺՀ արտաքին գործերի նախարարի տեղակալ Լյու Բինը, ում հետ տեղի է ունեցել կարճատև ջերմ զրույց և լուսանկարման պաշտոնական արարողություն։

Այս մասին սոցցանցի իր էջում գրել է Աննա Հակոբյանն ու տեսանյութ հրապարակել:

Միջոցառումն ազդարարվել է Հայաստանի և Չինաստանի պետական օրհներգների կատարմամբ, որին հաջորդել են պաշտոնական ելույթները։ Դեսպան Վահե Գևորգյանը, իր ողջույնի խոսքում մասնավորապես նշել է.

«Մենք հավատում ենք, որ առաջիկա տարիները նոր հնարավորություններ կբերեն ենթակառուցվածքային նախագծերի զարգացման համար՝ համապատասխանաբար Չինաստանի «Մեկ գոտի, մեկ ճանապարհ» և Հայաստանի «Խաղաղության խաչմերուկ» նախաձեռնությունների շրջանակում, ինչպես նշված է մեր երկրների առաջնորդների համատեղ հայտարարության մեջ»:

Այնուհետև ելույթով հանդես է եկել ՉԺՀ ԱԳ նախարարի տեղակալ Լյու Բինը՝ անդրադառնալով հայ-չինական համագործակցության զարգացման հեռանկարներին։

Երեկոն շարունակվել է բաժակաճառով՝ ի պատիվ երկու բարեկամ երկրների, և երաժշտականկատարումներով՝ Արամ Խաչատրյանի անվան պատանեկան երաժշտական մրցույթի հաղթողների մասնակցությամբ։

Երեկոն եզրափակվել է տոնական ընդունելությամբ, որին մասնակցել են տեղական ու միջազգային հյուրեր, դիվանագիտական առաքելությունների ներկայացուցիչներ և հայ համայնքի անդամներ։