Քաղաքագետ Դավիթ Ստեփանյանի խոսքով՝ Ալիևը եղել է, կա ու կմնա մեկը, որը ցանկանում է ՀՀ-ին ոչնչացնել որպես պետություն, սակայն այս պահին նա չի կարող դա անել:

Ըստ Ստեփանյանի՝ նրա հռետորաբանությունը պայմանավորված է իրողություններով, ինչ-որ առումով՝ նաև լսարաններով:

«Ինչո՞ւ է իրեն երկերեսանի Յանուսի նման պահում. Ալիևը ստիպված է գնում հռետորաբանության մեղմացման, որովհետև նրան Վաշինգտոնում առաջարկ է եղել պայմանական, որից չի կարող հրաժարվել: Եթե հրաժարվեր, նրա համար լավ չէր լինի, և կարող է Ադրբեջանը բոլոր ճակատներով նահանջել: Ալիևին անհրաժեշտ են նոր օրակարգ և ուղղություն, որի միջոցով կարող է երկիրը պահել առաջին էշելոնում»,- նկատում է նա:

Ըստ քաղաքագետի՝ Ղարաբաղի հարցում Ալիևը փորձում է թանկ վաճառել սեփական ծառայությունները և դերակատարությունը. «Ստանալ ամեն ինչ Ռուսաստանի օգնությամբ չստացվեց, գնում է Թրամփի ուղով՝ փորձելով ստանալ այն, ինչ կարող է»:

Զրուցակիցը կարծում է, որ հայ-թուրքական սահմանի բացմամբ ամբողջությամբ կփոխվի իրավիճակը մեր երկրում. «Մենք այս պահին ամբողջությամբ կախված ենք Վերին Լարսից, որը ՌԴ-ի քմահաճույքով փակվում-բացվում է: Թուրքիային ևս պետք է սահմանի բացումը. նա դրանով վերադառնում է Հարավային Կովկաս: Եթե հայ-թուրքական սահմանի բացումը վատ է, ինչո՞ւ է Ադրբեջանը դեմ դրան: Մեր կողմից ամենաողջամիտ որոշումն այն կլինի, որ բանակցություններում առհասարակ Ցեղասպանության թեմայից չխոսենք, օրակարգում չպետք է լինի դա: Չպետք է սրա վրա փորձենք փող աշխատել, ամոթն էլ է լավ բան: Շատ երկրներ սրա վրա քաղաքական դիվիդենդներ են հավաքել, ընդդիմությունն էլ է դա անում: Եկել է ժամանակը մեր քաղաքականությունը վերանայելու, բայց սա չի նշանակում, որ պատրաստվում ենք մոռանալ Ցեղասպանության փաստը»:

Անդրադառնալով Գյումրու քաղաքապետ Վարդան Ղուկասյանին՝ քաղաքագետը նկատում է. «Նա քաղաքական ծաղրածու է, Գյումրու կոմունալ խնդիրները թողած՝ բարձր քաղաքականությունից է խոսում, որ մենք պետք է ռուսի տակ պառկենք: Եթե Վարդան Ղուկասյանն ուզում է մտնել ռուսի տակ, թող մտնի ապրի ինչքան ուզում է: Քաղաքն իր համար գրդոնի առարկա է, հոգով ստրուկ է, դրա համար էլ խոսում է ստրկության մասին»:

Ինչ վերաբերում է խոսակցություններին, ըստ որոնց՝ Ռոբերտ Քոչարյանը գնացել է Մոսկվա և հանդիպումներ ունեցել, Ստեփանյանն ասում է՝ նրա համար իշխանությունը փող ձեռք բերելու ճանապարհ է. «Երևի գնացել ռուսներից փող է ուզել, որ իր փողը չծախսի: Վաղվա ասուլիսին նամյոկներ կտա՝ տվե՞լ են, թե՞ չէ»:

Դավիթ Ստեփանյանը կարծում է, որ Սամվել Կարապետյանը մրցակից է Քոչարյանին, սակայն եթե իրավիճակ ստեղծվի, Գյումրիի օրինակով միանալու են:

Զրուցակիցը համարում է, որ իմպիչմենտի գործընթացը ընդդիմության, մասնավորապես Սերժ Սարգսյանի թիմի համար իրենց մասին հիշեցնելու համար է. «Ռացիոնալ ուժ լինեին՝ Մասիսի քաղաքապետին թեկնածու չէին դնի. մարդիկ շատ լավ հիշում են, թե նա ինչպես էր 2018-ին հավաքները բռնի ցրում»:

Առավել մանրամասն՝ «Հայկական ժամանակ»-ի հետ հարցազրույցում: