«Քաղաքացիական պայմանագիրը» կուսակցության համաժողովից առաջ ՀԷՑ-ի ժամանակավոր կառավարիչ Ռոմանոս Պետրոսյանն անդրադառնալով կուսակցության ներսում սկանդալների վերաբերյալ տեղեկություններին, ասաց՝ բամբասանքներ են:

Կա պաշտոնական հաղորդագրություն Ալեն Սիմոնյանի և Հայկ Սարգսյանի միջև միջադեպի մասին՝ դիտարկմանն ի պատասխան, Պետրոսյանը նշեց.

«Դա բնական, ներկուսակցական, օրգանիկ գործընթացներ են։ «Քաղաքացիական պայմանագիրը» արդեն 10 տարեկան է և այսօր մեր հերթական յոթերորդ համաժողովն է, որը հաջորդել է ներկուսակցական շատ առողջ, ինստիտուցիոնալ, ընդգրկուն քարոզարշավին, որպեսզի կուսակցությունը ընտրի իր գործադիր բարձրագույն մարմնին՝ կանոնադրության համաձայն։ Եվ ես շատ ուրախ եմ, որ կուսակցությունը 10 տարում դարձել է այնպիսի ինստիտուցիոնալ կառույց, որ որևէ անձնակենտրոն, որևէ քմահաճությունների բերումով ղեկավար կազմեր չի ձևավորում, ամբողջը իրականացվում է առողջ քաղաքական մրցապայքարի բովով անցնելով։

Այդ գործընթացները, բնականաբար, կարող են զուգորդվել տարբեր տեսակետների առողջ բախումներով, ընդամենը դա էր: ՔՊ-ում ամեն ինչ կայուն է, ամեն ինչ առողջ է և նաև վարչապետն ասաց, որ արշալույսները խաղաղ են, բայց գործընթացներ կան, ինչը շատ նորմալ է»։