Սվերդլովսկի մարզում հոկտեմբերի 24-ին անհետացած ադրբեջանցի 49-ամյա գործարար Իլգար Խանադանովը մահացած է հայտնաբերվել։ Այս մասին հայտնել է E1.RU պորտալը։ Նրա մահվան կապակցությամբ հարուցվել է քրեական գործ։

Մահացածի կնոջ խոսքով՝ Խանադանովի մարմինը կտեղափոխվի Ադրբեջան, որտեղ նրան կհուղարկավորեն։ Նա պնդում է, որ իր ամուսինը պարտքեր կամ բիզնես վեճեր չի ունեցել։ Իլգար Խանադանովը փոքրիկ ռեստորանի սեփականատեր էր։

Ըստ տեղեկությունների՝ անհետացման օրը նա վերադառնում էր Մեզենսկայա գյուղից, երբ նրան զանգահարել է անհայտ մեկը, որից հետո գործարարը կապի դուրս չի եկել։

Հաջորդ օրը նրա սպիտակ Mercedes մեքենան հայտնաբերվել է անտառում՝ արյան հետքերով։ Բանալիները եղել են մեքենայում, բայց նրա փաստաթղթերը և հեռախոսը բացակայում էին։ Ոստիկանությունը և բազմաթիվ կամավորներ որոնել են անհետ կորած 49-ամյա գործարարին։ Նրա մնացորդները հայտնաբերվել են հոկտեմբերի 30-ին։

Չնայած ադրբեջանցու ընտանիքի հավաստիացումներին, որ Իլգարը որևէ կոնֆլիկտ չի ունեցել, նրա մահվան նոր հանգամանքներ են ի հայտ եկել։ Գործարարի մահվան մեջ կասկածվում է սրճարանի խոհարարը, հայտնել է Ռուսաստանի քննչական կոմիտեի տարածաշրջանային գրասենյակը։

Քննիչների խոսքով՝ հոկտեմբերի 25-ին մեղադրյալը վիճաբանել է ընկերոջ հետ հին ֆինանսական հարցերի շուրջ։ Երկուսն էլ եղել են հարբած վիճակում, և նրանց զրույցը թեժացել է։ Ինչ-որ պահի մեղադրյալը զինվել է կացնով և մահացու հարված է հասցրել ադրբեջանցու գլխին, այնուհետև նա վարել է ընկերոջ մեքենան՝ փորձելով թաքցնել հետքերը, և թաքցրել նրա մարմինը մայրուղու մոտ։

Կասկածյալը հերքել է իր մեղքը, սակայն պոլիգրաֆիկ հարցաքննության ժամանակ նա խոստովանել է ամեն ինչ և նույնիսկ լաց է եղել՝ պատմելով կոտորածի մանրամասները։