Այս տարի Հայաստանի ողջ տարածքում գարունն ու ամռան առաջին ամիսները աչքի ընկան առատ անձրևներով, որոշ մարզերում կարկուտ տեղաց, անգամ պտտահողմի ականատես եղանք, ինչի հետևանքով բազմաթիվ գյուղացիների բերքը վնասվեց։ Նրանցից շատերը նշում են, որ այս տարի բանջարեղենը և միրգը էլ ավելի թանկ կվաճառվեն, քան նախորդ տարիներին։

Առաջիկայում ևս, ըստ կանխատեսումների, անձրևներ ու կարկուտներ են սպասվում:

Ի՞նչ իրավիճակ է գյուղատնտեսության ոլորտում, ի՞նչ խնդիրներ կան, ի՞նչ ճգնաժամերի սպասենք աշնան բերքահավաքին․ այս հարցերի շուրջ MediaHub-ը զրուցեց գյուղատնտես Հարություն Մնացականյանի հետ։

«Այս տարի կարկուտը բավականին վնասներ հասցրեց այգիներին, ինչպես տեսնում եք՝ կարտոֆիլը բավականին թանկ է, 200 դրամից ավելի գնով է խանութներում վաճառվում: Խնձորի մասով էլ դեռ պետք է հասկանան. բերքահավաքը չի սկսվել»,– նշեց Մնացականյանը։

Ըստ գյուղատնտեսի՝ մոտ 40 գյուղ վնասներ է կրել կարկուտներից, այս տարի ծիրանի այգիներն են վնասվել, դեղձի այգիները, դրա պատճառով պտուղ–բանջարեղենի գինը բավականին բարձր է այս տարի, հատկապես երբ համեմատում ենք անցյալ տարվա գների հետ:

«Օրինակ՝ սալորի գինը երբեք այսպիսի բարձր չի եղել, սովորական սալորը վաճառվում է 500-900 դրամ՝ լավագույն դեպքում (Երևանի որոշ խանութներում այն վաճառվում է 1800 դրամով – խմբ.), և սա իսկապես անհավանական բարձր գին է սալորի համար։ Գյուղացիները բողոքում են՝ այս տարի ոռոգման խնդիր է եղել, ինչպես և այլ տարիներին, բայց չորացող ապրանք չի եղել, քանի որ բերքը քիչ է եղել, պահանջարկը՝ մեծ, ոչ մի գյուղացի իրացման խնդրի առջև չի կանգնել»,– ասաց գյուղատնտեսը։

Հարցին՝ ծիրանն այս տարի կարծես թանկ չէ, իսկ ի՞նչ գներ են ունենք դեղձի և խաղողի մասով, Մնացականյանը նշեց․
«Դեղձը հիմա էլ է բավականին թանկ, անցած տարի ավելի ցածր գին է եղել, իսկ ծիրանի մասով՝ սեզոնին արտահանումների հետ խնդիրներ կային, այդ շրջանում ՀՀ–ում ծիրանի գերկուտակում եղավ, դրա պատճառով այդ պահին գինը չբարձրացավ: Խաղողը այս տարի մթերվում է 150 դրամով, անցյալ տարի խաղողը մթերվել է 130 դրամով, իսկ Քիշմիշ սորտի խաղողը գյուղացիներից մթերում են 550 դրամով արտահանման համար, ինչը կրկին բարձր գին է»։

Ընդհանուր առմամբ, աշնանն էլ գյուղմթերքի գները լինելու են բարձր: