ՀՀ գլխավոր դատախազությունը Հակակոռուպցիոն դատարան հայցադիմում է ներկայացրել ընդդեմ Սամվել Կճոյանի՝ Արարատյան Հայրապետական Թեմի առաջնորդական փոխանորդ Տ. Նավասարդ արքեպիսկոպոս Կճոյանի՝ հողամասի կառուցապատման հարկադիր դադարման պահանջի մասին։ Այս մասին civic.am-ը տեղեկացավ «Դատալեքս» հարթակից։ Հայցապահանջի մասին լրացուցիչ տեղեկություններ ստանալու համար դիմեցինք ՀՀ գլխավոր դատախազություն, որտեղից փոխանցեցին․ «ՀՀ գլխավոր դատախազությունը հայցադիմում է ներկայացրել ՀՀ հակակոռուպցիոն դատարան` ընդդեմ Սամվել Ռուբենի Կճոյանի, երրորդ անձ՝ Երևան համայնքի՝ հողամասի կառուցապատման իրավունքը հարկադիր դադարեցնելու պահանջի մասին:

Երևանի քաղաքապետի 2012 թվականի հունվարի 30-ի N 671-Ա որոշման և Երևան համայնքի և Սամվել Ռուբենի Կճոյանի միջև 2012 թվականի փետրվարի 8-ին կնքված համայնքային սեփականություն հանդիսացող հողամասի կառուցապատման իրավունքի տրամադրման մասին պայմանագրի հիման վրա՝ Սամվել Ռուբենի Կճոյանին է տրամադրվել Երևան քաղաքի Սուրբ Աբգար Թագավորի փողոցի 77/2 հասցեում գտնվող, 8250.25 քմ մակերեսով հողամասը՝ հանգստի գոտի կազմակերպելու նպատակով: Հողամասը տրամադրվել է 49 տարի ժամկետով (մինչև 2061 թվականը): Սակայն նշված հողամասը մինչ օրս չի կառուցապատվել, որպեսզի հանգամանքը ՀՀ հողային օրենսգրքի 102-րդ հոդվածի 1-ին մասի 4-րդ կետի ուժով հողամասի նկատմամբ կառուցապատման իրավունքի հարկադիր դադարման հիմք է հանդիսանում»։ Դատախազության պարզաբանմամբ՝ հիշյալ դրույթի համաձայն՝ հողամասի նկատմամբ իրավունքները հարկադիր կարգով դադարում են դատական կարգով, մասնավորապես հետևյալ հիմքով՝ «կառուցապատման համար տրամադրված հողամասը կամ դրա մասը երեք տարվա ընթացքում չօգտագործելը, եթե պայմանագրով նախատեսված չեն շինարարության ավարտի ավելի երկարատև ժամկետներ»։ Նշենք, որ Դատախազության հայցապահանջը ներկայացվել է ս․թ․ սեպտեմբերի 24-ին, գործով դատավորն է Կարապետ Բադալյանը։

Նշենք, որ Հակակոռուպցիոն դատարանում քննվում է նաեւ ՀՀ գլխավոր դատախազության կողմից ներկայացված մեկ այլ հայցապահանջ։ Այս մասով ինֆորմացիան սահմանափակված է «Դատալեքս»-ում, հետեւապես հայտնի չէ՝ ինչ ընթացքում է դատաքննությունը։

Հիշեցնենք, որ արքեպիսկոպոսը 2023-ին հունվարին հրավիրվել էր ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչություն:

Հ․Մ․