Ալպյան սառցադաշտերի հալքը Շվեյցարիայում վերջին տասնամյակներում ավելի արագ է տեղի ունենում։ Այս մասին հոդված է հրապարակել «Հիդրոօդերևութաբանության և մոնիթորինգի կենտրոն» ՊՈԱԿ-ը:

Սառցադաշտերի մոնիթորինգի GLAMOS (Glacier Monitoring in Switzerland) ցանցի տվյալներով՝ 2015–2025 թթ․ ժամանակահատվածում սառցադաշտերի ծավալը նվազել է շուրջ 24%-ով, ինչը զգալիորեն գերազանցում է 1990-ական և 2000-ական թվականներին գրանցված հալքի միջին տեմպերը։

Միայն 2025 թվականի ընթացքում արձանագրվել է սառցադաշտերի ծավալի լրացուցիչ 3%-անոց նվազում, որը պայմանավորված է ձյան պաշարների անբավարար կուտակմամբ և ամառային ամիսներին դիտված անոմալ բարձր ջերմաստիճաններով։

GLAMOS-ի տվյալների համաձայն՝ 1970-ականներից ի վեր Շվեյցարիայում անհետացել է շուրջ 1100 սառցադաշտ։ 21-րդ դարի առաջին քառորդում սառցադաշտերի ընդհանուր ծավալը նվազել է մոտ 30 կիլոմետր խորանարդով, իսկ մակերեսը կրճատվել է մոտ 30%-ով՝ հասնելով 755 կմ²-ի

Հիդրոկլիմայական գնահատականները վկայում են, որ ընթացիկ միտումների պահպանման դեպքում դարի ավարտին Շվեյցարիայի սառցադաշտերը կարող են գրեթե ամբողջությամբ կորցնել իրենց ծավալը։

Սառցադաշտերի հալքը լուրջ սպառնալիք է ոչ միայն երկրի ջրային պաշարների պահպանման, այլև լեռնային համակարգերի գեոդինամիկ կայունության համար։