Միջազգային հարաբերությունների մասնագետ, հասարակական գործիչ Գիորգի Թումասյանի փոխանցմամբ՝ Վրաստանում ներքաղաքական ճգնաժամը շարունակվում է, որը սկսվել է 2024 թվականի հոկտեմբերին, երբ միջազգային հանրությունը և ընդդիմադիր քաղաքական ուժերը չճանաչեցին ընտրությունների արդյունքները և մուտք չգործեցին խորհրդարան:

Այս մասին նա «Հայկական ժամանակ»-ին հաղորդել է հարևան Վրաստանից՝ մանրամասնելով իրավիճակը.

«Դրանից հետո վարչապետ Կոբախիձեն հայտարարեց, որ կասեցնում է Վրաստանի՝ Եվրոպական միությունում անդամակցության գործընթացը, սրանից հետո սկսվել են ամենօրյա ցույցեր: Հոկտեմբերի 4-ին նշանակված էին ՏԻՄ ընտրություններ, որը ընդդիմության 90 տոկոսը բոյկոտեց: Ընդդիմության և հասարակության օրակարգն էր մեծ ցույց անելը: 100 հազարից ավելի մարդ դուրս եկավ Ազատության հրապարակից մինչև Հանրապետության հրապարակ: Մարդիկ շարժվեցին նախագահի նստավայր, որտեղ բախումներ եղան: Ցույցի քիչ մասնակիցներ էին անցել նախագահի նստավայրի տարածք: Կազմակերպիչներից 5 հոգի ձերբակալվել է: Շատ բարդ իրավիճակ է ստեղծվել»:

Ըստ զրուցակցի՝ նահանջ չի լինի, սակայն պետք են նոր և առողջ ընդդիմադիր ուժեր, որոնք կկարողանան իրական այլընտրանք լինել Բիձինա Իվանիշվիի համակարգի համար:

Վերջինս նկատում է, որ այս ամենում Ռուսաստանի մասնակցության դերը մեծ է. սպառնալիքներ են հնչում. «Շատ պարզ է, թե ՌԴ-ն այստեղ ում վրա խաղադրույք ունի արած: Ռուսաստանը նորից գրավել է Վրաստանը: Սպառնում են պատերազմով, եթե ռուս օլիգարխ Իվանիշվիլին կորցնի իշխանությունը»:

Ըստ Թումասյանի՝ ցույցերին մասնակցում են են նաև հոգևորականներ և առաջնորդում են ժողովրդին. «Հոգևորականները կոչ են անում միջազգային հանրությանը օգնել վրաց ժողովրդին:

Միջազգային հարաբերությունների մասնագետ, հասարակական գործիչ Գիորգի Թումասյանը նկատում է՝ Հայաստանում իշխանությունները կարողանում են ճիշտ բալանսավորված քաղաքականություն վարել, ինչը չես ասի Վրաստանի իշխանությունների դեպքում:

Միաժամանակ զրուցակիցը չի բացառում, որ 2026 թվականին ՀՀ-ում սպասվող խորհրդարանական ընտրություններում ևս կարող են այս սպառնալիքները լինել. «ՌԴ-ն ուզում է ՀՀ-ում էլ իր գործակալներին վերադարձնել իշխանության: ՀՀ իշխանությունները պետք է կիրառեն «պողպատե մանդատ»-ը, չպետք է թույլ տան ահաբեկչության որևէ փորձ, որի գլխավոր սպառնալիքը գալիս է ՀՅԴ-ից: Եկեղեցին պետք է Կտրիճ Ներսիսյանից ազատվի. կարող է մեր եկեղեցին օգտագործվի ՀՀ շահերի դեմ: Կոչ եմ անում ՀՀ հանրությանը չխաբվել օլիգարխ Սամվել Կարապետյանի ամենաստոր մոտեցումներին, որը ուզում է կրկնել Իվանիշվիլիի սցենարը և ՀՀ-ն հանձնել ՌԴ-ին: Զրկեք նրան հնարավորությունից, որ չկարողանա գումարներ ծախսել ՀՀ-ում: Դա նրան տվել են, որ օգտագործի ՀՀ-ի դեմ: Միութենական պետություն մտցնելը նշանակում է չեղարկել ՀՀ պետականությունն առհասարակ: Սա չի կարելի համեմատել Եվրամիությանն անդամակցելու հետ»:

Առավել մանրամասն՝ հարցազրույցում