«Կրասնոդարի» ավագ և Հայաստանի հավաքականի խաղացող Էդուարդ Սպերցյանը կտրականապես հերքել է «Ախմատի» խաղացողի կողմից իր հասցեին ռասիզմի մասին մեղադրանքները:

«Պատրաստ եմ ամեն կերպ ապացուցել իմ իրավացիությունը՝ նայեք տեսախցիկներին։ Ես վստահ եմ ինձ վրա և գիտեմ, որ ես դա չեմ ասել։ Ես մեծացել եմ Կովկասում, ես գիտեմ բոլոր հայեցակարգերը։ Ես երբեք այդպիսի բան ինձ թույլ չեմ տա»,- ասել է ֆուտբոլիստը։

Նշենք՝ ՌՊԼ-ի 11-րդ տուրի «Ախմատի» դեմ կայացած տնային խաղում (2։0) մրցակցի պաշտպան Ուսման Նդոնգը Սպերցյանի ծնոտին հարվածելու համար ուղիղ կարմիր քարտով հեռացվել էր խաղադաշտից։

Խաղից հետո տված հարցազրույցում նա մեղադրել էր Սպերցյանին իր հասցեին ռասիստական վիրավորանքներ հնչեցնելու մեջ, Սպերցյանն էլ պնդել էր հակառակը՝ նշելով, որ Նդոնգը վիրավորել է իր մորը, սակայն ինքը սադրանքին չի տրվել: