Սեպտեմբերի 18-ին տեղի է ունեցել State&amp Tech bridge միջոցառումը, որը միտված էր կամուրջ ապահովելու գործադիր մարմինների և տեխնոլոգիական ոլորտի ներկայացուցիչների միջև։

Հանդիպումը տեղի է ունեցել ԱԺ փոխնախագահ Հակոբ Արշակյանի խորհրդական Սերգեյ Մուրադյանի նախաձեռնությամբ՝ նպատակ ունենալով քննարկել բարձր տեխնոլոգիաների ոլորտում գործունեություն ծավալող ընկերություններին վերաբերող օրենսդրության լավարկումը, մեկնաբանել երկիմաստ հարցերը և ստեղծել ավելի լայն կամուրջ Ոլորտի և պետական մարմինների միջև։

«2025 թվականի առաջին կիսամյակի և 2024 թվականի առաջին կիսամյակի համադրության արդյունքում տեխնոլոգիական ոլորտի համախառն շրջանառությունը աճել է 30,4 տոկոսի չափով, իսկ 2025/2024 հունիս համադրության արդյունքում աշխատակիցների քանակը աճել է 878-ով»- ասել է Սերգեյ Մուրադյանը։

Հանդիպմանը ներկա են գտնվել Բարձր տեխնոլոգիական արդյունաբերության նախարարի տեղակալ Ռուբեն Սիմոնյանը, Բարձր տեխնոլոգիական արդյունաբերության նախարարության գլխավոր քարտուղար Դավիթ Գասպարյանը, ՊԵԿ նախագահի առաջին տեղակալ Վրեժ Մխիթարյանը, սոցիալական հարցերի նախարարի տեղակալ Ռուբեն Սարգսյանը, ՖՆ Եկամուտների քաղաքականության ևվարչարարության մեթոդաբանության վարչության պետ Օրի Ալավերդյանը, Բարձրագույն կրթության և գիտության կոմիտեի նախագահի տեղակալ Արտուր Մովիսիյանը և Էկոնոմիկայի նախարարության Գործարար վարչության պետ Քրիստինե Գևորգյանը։

Ներկա են եղել նաև ՀՀ վարչապետին կից գիտության և տեխնոլոգիաների զարգացման խորհրդի ներկայացուցիչներ:

Վերջին տարիներին ոլորտի մասնաբաժինը հարկային եկամուտների ընդհանուր կառուցվածքում շարունակաբար ավելանում է։

«2025 թ-ի բյուջեի հավաքագրումներում ՏՏ ոլորտի մասնաբաժինը կազմել է շուրջ 7,6 տոկոս» — շեշտել է Վրեժ Մխիթարյանը։

Բիզնես ոլորտից միջոցառմանը մասնակցել են խոշոր կազմակերպությունների․ միջազգային կորպորացիաների հայաստանյան դուստր ընկերությունների, լոկալ ընկերությունների ղեկավարներ և ներկայացուցիչներ, մասնավորապես NVIDIA, ԴատաԱրտ, Սերվիս Թայթան, Սիմենս, Xilinx, Adobe, Yandex, ներկա են գտնվել նաև ոլորտը ներկայացնող ասոցացիաների ներկայացուցիչներ։