Ծաղկաձորի գլխավոր մարզահամալիրի լողավազանը պաշտոնապես լիցենզավորվել է՝ որպես եվրոպական չափանիշներին համապատասխանող ջրային մարզաձևերի կենտրոն։ Սա առաջին նմանատիպ լիցենզիան է Հայաստանում, որը տրվել է եվրոպական ջրային ձևերի ֆեդերացիայի կողմից: Մինչ այս նշանակալի իրադարձությունը, մարզահամալիրում անցկացվում էին տարբեր ուսումնամարզական հավաքներ, որոնց մասնակցում էին մարզիկներ Ռուսաստանից, Վրաստանից, Ղազախստանից, Լատվիայից, սակայն այս նոր ձեռքբերումը զգալիորեն լայնացնում է սպորտային համագործակցության աշխարհագրությունը՝ մարզիների համար ստեղծելով նոր հնարավորություններ:

«Լողավազանը կառուցված է եվրոպական և համաշխարհային չափանիշներով, ինչպես նաև հյուրանոցը: Բոլոր հարմարությունները հիանալի են։ Կարծում եմ՝ լավ հնարավորություն է մարզական համալիրի համար ստանալ վկայական, որը թույլ կտա հյուրընկալել միջազգային թիմեր՝ մարզումների համար»,-ասում է Եվրոպայի ջրային ձևերի ֆեդերացիայի նախագահի առաջին տեղակալ Ջոզեպ Վարվոդիչը:

Լիցենզիայի տրամադրումը կարևոր քայլ է մարզահամալիրի զարգացման ճանապարհին, վստահ է մարզահամալիրի ղեկավար Վարդան Զաքարյանը: Նա խոսքով՝ լիցենզավորումը նոր ճանապարհ է բացելու դեպի Եվրոպա, որը հատկանշական ձեռքբերում է:

ԿԳՄՍ նախարարության ներկայացուցիչը ևս կարևորում է իրադարձությունը և նշում, որ պետություն-լողի ֆեդերացիա-սպորտային համալիր կապը թույլ է տալիս համատեղ ջանքերով բարձրացնել ջրային մարզաձևերի մակարդակը Հայաստանում և ապահովել մարզիկների լիարժեք հարմարավետությունը: Այս համատեղ աշխատանքը հիմք է Հայաստանի սպորտային ներուժը զարգացնելու և միջազգային ասպարեզում ներկայացնելու համար:

«Դա մեծ պատիվ է մեր երկրի համար և մեր կառույցի համար: Դա կխթանի, որ եվրոպական ֆեդերացիաները ավելի շատ ներգրավվեն, ավելի շատ Հայաստան գան և օգտվեն սպորտհամալիրի հնարավորություններից»,-նշում է Արթուր Սեդրակյանը, ով ԿԳՄՍ նախարարության Քաղաքականության մշակման և վերլուծությունների բաժնի պետն է:

Այսպիսով՝ Ծաղկաձորի գլխավոր մարզահամալիրի լողավազանի լիցենզավորումը նոր էջ է բացում հայկական ջրային մարզաձևերի զարգացման պատմության մեջ։ Մարզահամալիրը շարունակում է բացել հաղթական ուղի այն մարզիկների համար, ովքեր ցանկանում են հասնել նորանոր նվաճումների: