Ծափաթաղ համայնքի 3-ամյա Տիգրան Օվանեսովի որոնումները դեռ շարունակվում են, երեխային այս պահի դրությամբ չեն հայտնաբերել։ Այս մասին «Փաստինֆո»-ն տեղեկանում է ՆԳՆ-ից։

Հիշեցնենք, որ Տիգրան Օվանեսովին փնտրում են հոկտեմբերի 27-ից՝ այն բանից հետո, երբ հայտնի դարձավ, որ Գեղարքունիքի մարզի Ծափաթաղ գյուղի 3-ամյա բնակիչը կորել է։ Նա եղբոր հետ բակում էր խաղում, ապա նրանց նկատել են հարակից դաշտում։ Ավելի ուշ եղբայրը վերադարձել է տուն, իսկ Տիգրանը՝ անհետացել։ Քանի որ եղբայրը խոսելու հնարավորություն չունի, նրանից հստակ տեղեկություն ստանալ հնարավոր չի եղել։

Փրկարարների, ոստիկանների և կամավորների խմբերը որոնումներ են իրականացրել գյուղում, դաշտերում ու անտառում։ Թեպետ Սևանա լիճը գտնվում է համայնքից մի քանի կիլոմետր հեռավորության վրա, որոնումները կազմակերպվել են նաև լճի ափամերձ տարածքներում և Սևանա լճում։