Շուրջ հինգ տարի ուսումնասիրում եմ պոլսահայ համայնքը՝ փնտրելով հայերենն ու հայկականը, սակայն փառահեղ անցյալ ունեցող այդ համայնքում հայերենը ակնհայտորեն նահանջ է ապրում: Այն կիրառելի չէ նույնիսկ որոշ հոգևոր կենտրոններում:

Այս տխուր խորապատկերին նշմարվում են նաև առկայծող կետեր, որոնք կարող են փարոս դառնալ մշակութային ժառանգության զարթոնքի և ազգային իղձերի իրականացման ճանապարհին:

Համացանցային բազմաթիվ ընկերների շարքում ուշադրությունս գրավեց շնորհալի մի հայուհի՝ Նվարդ Ավետիքյան (Ավեդիքօղլու), որը զարմացրեց հայերենի հրաշալի իմացությամբ, խոհուն ու խորիմաստ մտքերով:

Պոլսի «Ժամանակ» օրաթերթից պարզ դարձավ, որ նա սերել է Սկյուտարի ավանդապահ ու ավանդապաշտ ընտանիքից, հաճախել է հայկական դպրոց, ստացել է համալսարանական տնտեսագիտական կրթություն, ունի ընդգծված երաժշտական հակումներ: Ի պաշտոնե տնտեսագետ է, կոչումով՝ երգչուհի:

Նվարդի երգացանկում մեծապես ներառված են հայկական ժողովրդական ու գուսանական երգեր, նրա կատարողական արվեստը բարձր է գնահատվել Պոլսի, Բեյրութի և Հայաստանի մամուլի էջերում: Նվարդի անունը տեղ է գտել նաև լրագրող Սագո Արեյանի «33 ձայն Իստանպուլէն» գրքի էջերում, որտեղ լրագրողի հարցին ի պատասխան՝ Հայրենիքը երբեք չտեսած երգչուհին իր փափագն է արտահայտում՝ իր ձայնով ու երգով հայության կամուրջ դառնալ: Ընտրվել է նաև Սկյուտարի թաղային-եկեղեցական խորհրդի անդամ:

Չնայած իր բազմազբաղ առօրյային՝ նա, աշխատանքային թրքախոս միջավայրից զատ, լծվել է հայ լեզվի ու մշակույթի պահպանման ու տարածման նվիրական առաքելությանը: Տիրապետում է մի քանի լեզուների, և իր Նվարդ անվանը հավատարիմ՝ ամենաբարձր պատվանդանին է պահում Մայրենին:

Վերջին տարիներին մեր երկրի իշխանությունները որդեգրել են հարևան երկրի հետ հարաբերությունները կարգավորելու և խաղաղ գոյակցության մարտավարություն, որում, անշուշտ, մեծ դեր կունենա պոլսահայ համայնքը: Վերջերս ՀՀ վարչապետի այցը հարևան երկիր և բարձր մակարդակի պաշտոնական և համայնքային շփումներն ու քննարկումները միտված են այդ խնդրի լուծմանը: Համայնքային հանդիպման ժամանակ բարձրացվեց Պոլսում ՀՀ գլխավոր հյուպատոսություն բացելու հարցը, որում մեծ դեր կարող են ունենալ տեղի հայ մտավորականներն ու հանրային գործիչները՝ ի դեմս նաև Նվարդ Ավետիքյանի/Nivart Avedikoğlu:

Փառահեղ անցյալ և մշակութային մեծ ժառանգություն ունեցող պոլսահայ համայնքը պետք է զարթոնք ապրի:

Իսկ պետությունը պարտավոր է նռան առողջ հատիկները մեկտեղել՝ հանուն խաղաղ գոյակցության և ազգային իղձերի իրականացման: