«Ըստ ընդդիմության՝ ՀՀ-ում կան քաղբանտարկյալներ, բայց մենք բազմիցս ենք նշել, որ որևէ միջազգային կառույց չի արձանագրել, որ Հայաստանի Հանրապետությունում այս պահի դրությամբ, կամ առհասարակ 2018-ից հետո եղել են կամ կան քաղբանտարկյալներ»:

Այս մասին լրագրողների հետ զրույցում ասաց ԱԺ «Քաղաքացիական պայմանագիր» խմբակցության պատգամավոր Ալխաս Ղազարյանը:

«Բայց մինչ այդ բոլոր միջազգային կառույցները խոսել են 2008-ի «Մարտի 1»-ից հետո առկա քաղբանտարկյալների վերաբերյալ, արձանագրվել է միջազգային կառույցների զեկույցներում այդ մասին: Զավեշտն այն է, որ այն ուժերի ներկայացուցիչները, որոնց օրոք եղել են «Հոկտեմբերի 27», «Մարտի 1», Պողոս Պողոսյանի սպանություն և այլն, և իրենք հանրության համար մնացել են որպես մարդասպան ռեժիմի ներկայացուցիչներ, հանդես են գալիս քաղբանտարկյալների մասին զեկույցներով»,- ասաց Ղազարյանը:

Ըստ պատգամավորի՝ երկրում նաև ընդդիմության ասած ճգնաժամը չկա․ եթե լիներ, ապա քաղաքացին այն անպատասխան չէր թողնի: