«Քաղաքացիական պայմանագիր» խմբակցության քարտուղար Արթուր Հովհաննիսյանը հույս ունի, որ «Մարտի 1»-ի վերաբացված գործով առաջընթաց կլինի:

Ըստ նրա՝ 17 տարի է անցել, և բազմաթիվ հետքեր անհետացել են, օրինակ, փամփուշտների փոխարինման մասին պատմությունը, գործող անձանց թաքնվելը:

«Մարտի 1-ը տեղի ունեցավ Ռոբերտ Քոչարյանից Սերժ Սարգսյանին իշխանությունը փոխանցելու ճանապարհին: Երևանի կենտրոնում գնդակահարվեցին ՀՀ քաղաքացիները, և սրանից հետո կոծկվեցին փաստական մի շարք հանգամանքներ»,- ասում է նա:

ՄԻԵԴ-ը որոշում է հրապարակել, ըստ որի՝ 2008 թվականին խախտվել են մարդկանց իրավունքները, որի հետևանքով նրանք սպանվել են կրակոցներից, պետությունը չի կարողացել պաշտպանել իր քաղաքացիներին: «Հայաստան» խմբակցության ղեկավար Սեյրան Օհանյանը լրագրողների հետ զրույցում ասել է. «ՄԻԵԴ-ի որոշումը վերաբերում է պետությանը, մեզ հետ ի՞նչ կապ ունի»:

Արձագանքելով սրան՝ Արթուր Հովհաննիսյանն ասում է. «Մարդու իրավունքների եվրոպական դատարանն արձանագրել է իրողությունները, որոնք տեղի են ունեցել: Սեյրան Օհանյանի ասածը քաղաքական անգրագիտության դրսևորում է: Օհանյանը այդ ժամանակ եղել է Գլխավոր շտաբի պետը, և որևէ մեկի համար գաղտնիք չէ, որ այդ ժամանակ Երևանի կենտրոնում զինված ուժեր են եղել: Ես 2008 թվականի մայիսին եմ զորակոչվել բանակ, դրանից երկու ամիս առաջ իմ զորամասից մի քանի գումարտակ մասնակցել է այդ գործընթացներին․ ո՞ւմ է էշի տեղ դրել Օհանյանը: Պետությունը չի կարողացել ապահովել մարդկանց կյանքի իրավունքը, իսկ պետության գլուխը Ռոբերտ Քոչարյանն էր: Այլ բան չէր էլ կարելի ակնկալել Ռոբերտ Քոչարյանից և Սեյրան Օհանյանից»:

Դիտարկմանը, որ իշխանության ընդդիմախոսները պարբերաբար մեղադրանքներ են հնչեցնում, որ դատարաններն առաջնորդվում են իշխանության ցուցումներով, իշխող ուժի անդամը նկատում է. «Եթե դատարանները մեր կամակատարներն են, ինչո՞ւ են ընդդիմադիրները մեր դեմ հարյուրավոր հայցեր ներկայացնում: Հերթական անտրամաբանական խոսույթներից մեկն է»:

Անդրադառնալով Գյումրու քաղաքապետ Վարդան Ղուկասյանի այն հայտարարությանը, թե Հայաստանը պետք է Ռուսաստանի հետ միութենական պետության մաս կազմի, պատգամավորը նշում է. «Վարդան Ղուկասյանի միջից հորդում է ընդդիմության ամբողջ կեղտը: Նա ընդդիմության հավաքական կերպարն է: Սերժի և Քոչարյանի թիմերը քցել են ժողովրդին, և Վարդանիկը հայտնվել է քաղաքապետի աթոռին: Ես չէ, որ քաղաքացիներին պետք է պատմեմ Վարդանիկի մասին: Վարդանիկի ու նրա նմանների երազանքն է ՀՀ կառավարումը հանձնել արտաքին ուժերին, և իրենք էլ դառնան գուբերնատորներ»:

Ինչ վերաբերում է ընդդիմության կողմից հերթական անգամ վարչապետին անվստահություն հայտնելու գործընթաց ձեռնարկելուն, Հովհաննիսյանը ընդգծում է. «Իմպիչմենտի գործընթացը հերթական կեղծ օրակարգն է: Նպատակը մնում է մեկը՝ նսեմացնել Հայաստանի Հանրապետությունը, գողանալ ժողովրդի իշխանությունը: Գիտեն, որ ժողովրդի քվեով շանս չունեն, մեկը մեկից անհաջող թեկնածուներ են բերում և այլ ճանապարհներով են փորձում իշխանությունը զավթել: Ընդդիմությունը իր բոլոր թեզերով ոչնչացվել է օգոստոսի 8-ին Վաշինգտոնում կնքված պայմանագրերով»:

Առավել մանրամասն՝ «Հայկական ժամանակ»-ի հետ հարցազրույցում: