Սևան քաղաքում արձանագրված ողբերգական միջադեպի արդյունքում 29-ամյա երիտասարդը մահացել է։

Ֆոտոլրագրող Գագիկ Շամշյանի փոխանցմամբ՝ մայիսի 19-ին՝ մոտավորապես ժամը 21:00-ի սահմաններում, «Սևան» բժշկական կենտրոնից ՀՀ ՆԳՆ ոստիկանության քրեական ոստիկանության գլխավոր վարչության Գեղարքունիքի մարզային վարչություն ահազանգ է ստացվել, որ դանակի բազմաթիվ հարվածներից ստացած վնասվածքներով բուժհաստատություն է տեղափոխվել Գեղարքունիքի մարզի բնակիչ 29-ամյա Հովհաննես Պողոսյանը։

Չնայած բժիշկների ջանքերին՝ նա հիվանդանոցում գիտակցության չգալով մահացել է։

Oragir.News-ի տեղեկություններով՝ մահացածը Գեղարքունիքի մարզի Լճաշեն գյուղի բնակիչ Հովհաննես Կարապետյանն է։

Աղբյուրի տեղեկություններով՝ սպանության պատճառը եղել է օրեր առաջ տեղի ունեցած վիճաբանությունը։ 24-ամյա երիտասարդը դեպքից երեք օր առաջ ծեծի է ենթարկել մահացածի հորը, ով աշխատում է գազալցակայանում։

Վերջինս նրան նկատողություն էր արել՝ հորդորելով չծխել տարածքում։

Այնուհետև 29-ամյա երիտասարդը փորձել է գտնել հորը ծեծած անձին։ Մի քանի օր անց նա դրսում պատահաբար հանդիպել է 24-ամյա երիտասարդին և կանգնեցրել։

Այդ պահին կասկածյալը մեքենայից իջել է և առանց որևէ բան ասելու դանակի մի քանի հարված է հասցրել երիտասարդին, ինչի հետևանքով էլ նա տեղափոխվել է հիվանդանոց և այնտեղ մահացել։

«Ասում են՝ սովորական դանակի չի էղել, խանչալ ա էղել, ոնց որ 6 հարված ա հասցրել, էնքան ուժեղ, որ ասում են՝ դանակի հարվածից ոսկոր ա կոտորվել նույնիսկ։ Խեղճ տղու հորն ա ծեծել, դեմքին լրիվ կապտուկներ ա էդ մարդու։

Պատմում են, որ հորն ու մոր հետ ա էղել էդ մարդուն ծեծելու ժամանակ, նենց ա ծեծել, որ հերն ու մերն էլ չեն կարացել ազատեն։ Շատ վատ բան ա էղել։

Հովոն շատ լավ տղա էր, իրա ընտանիքն էլ, մակարդակով մարդիկ են։

Հազար ափսոս․․․ հիմա էլ ասում են գիժ ա, որ գիժ ա ինչի ա ազատության մեջ։

Անպայման պիտի պատժվի, հորը ծեծի, տղուն սպանի ու գիժ դուրս գա»,- պատմել է ականատեսը։