«Վահեն հայաթում մի հատ կռիվ արած չկա». Էջմիածնում ցնցված են հայրասպանության դեպքից

Էջմիածնի բնակիչները ցնցված են վաղ առավոտյան տեղի ունեցած ահասարսուռ դեպքից։ 22-ամյա տղան սպանել է 65-ամյա հորը, ապա փորձել ինքնասպան լինել։ Հարևանները աղմուկ և արտառոց ձայներ չեն լսել։ Դեպքի մասին իմացել են միայն այն ժամանակ, երբ իրավապահները կոտրելով բացել են բնակարանի դուռը։

«Էդ երեխուն ես փոքրուց պահել եմ, շատ խելոք տղա էր, իր ծնողներն էլ շատ հանգիստ լավ մարդիկ։ Ռեմոնտի մեջ էին, երեկ էլ տեսա Վահեին, հարցրեց՝ տատի ջան ոնց ես, թե ինչ ա կատարվել, չգիտենք։ Շատ ահավոր զարմացա, որ առավոտ իմացա, այդ տղից չէի սպասում, Վահեն մի հատ հայաթում կռիվ չի արել, մեկին վիրավորած չկա։ Ասում են՝ ինքն էլ պարեկներին ասել է, որ հորը սպանել է, չեք հավատում, գնացեք էս հասցեով տեսեք»,– պատմեց հարեւանուհին։

Նշենք,որ համացնացում դեպքի վայրից կադրեր են հայտնվել, որոնցում երևում են սպանված տղամարդու կողքին ընկած թղթադրամներ։ Հարևանները ևս նկատել են, բայց չեն կարծում, որ վիճաբանությունը կարող էր գումարային հարցերի շուրջ ծագած լինել։

«Էդ երեխեն իմ աչքի դեմն է ծնվել, մեծացել, ես նման բան չեմ տեսել՝ շեղվածություն կամ թմրանյութերի հետ գործ ունենար կամ խմիչքի, չեմ տեսել, որ հարբած գա տուն, ձենը քցի գլուխը»,– ասաց մյուս հարեւանը։

Թե ինչն է եղել սպանության պատճառը, առայժմ հայտնի չէ։ Քննչական կոմիտեից հայտնում են, որ դեպքի առթիվ նախաձեռնվել է քրեական վարույթ՝ մերձավոր ազգականի կողմից սպանություն կատարելու հատկանիշներով։ Նշանակվել են դիակի դատաբժշկական, դատահետքաբանական, դատակենսաբանական փորձաքննություններ: Կատարվում են ապացուցողական և վարութային գործողություններ։ 22-ամյա տղային ձերբակալելու որոշում է կայացվել։

Մանրամասները՝ դիտեք տեսանյութում։