Ահաբեկչական սպառնալիքների դեպքում առաջնահերթությունը մնում է մարդկանց անվտանգությունը, հայտարարել է Ռուսաստանի նախագահ Վլադիմիր Պուտինը՝ անդրադառնալով համացանցի աշխատանքի հնարավոր սահմանափակումներին, հայտնում է «Коммерсантъ»-ը։

Նրա խոսքով՝ ահաբեկչությունների կանխման ընթացքում սահմանափակումների վերաբերյալ լայն հանրային իրազեկումը կարող է խոչընդոտել օպերատիվ աշխատանքին, քանի որ հանցագործները նույնպես հետևում են տեղեկատվությանը և կարող են փոխել իրենց վարքագիծն ու ծրագրերը։

Կառավարության անդամների հետ խորհրդակցության ժամանակ Պուտինը նշել է, որ անհրաժեշտ է, այնուամենայնիվ, քաղաքացիներին տեղեկացնել իրականացված գործողությունների մասին՝ օպերատիվ ծառայությունների աշխատանքի արդյունքների հիման վրա։

Նրա համոզմամբ՝ իրավապահ մարմինների և քաղաքացիական կառույցների միջև պետք է ապահովվի արդյունավետ համակարգում՝ օպտիմալ լուծումներ գտնելու համար։

«Ակնկալում ենք, որ իրավապահ մարմինները իրենց աշխատանքում կցուցաբերեն բարձր պրոֆեսիոնալիզմ և հաշվի կառնեն քաղաքացիների կենսական շահերը»,– ասել է Պուտինը։

Ռուսաստանի որոշ տարածաշրջաններում ինտերնետի սահմանափակումներ են կիրառվում «անօդաչուների վտանգի» ռեժիմի ընթացքում։ Մի շարք մարզերում իշխանությունները բնակիչներին նախապես տեղեկացնում են հնարավոր խափանումների մասին։ Այդ ընթացքում հասանելի են մնում «սպիտակ ցուցակում» ներառված ծառայությունները, այդ թվում՝ բանկային հավելվածներ, մարկետփլեյսներ և որոշ լրատվամիջոցներ, որոնց թիվը գերազանցում է 500-ը։