Այսօր՝ հունիսի 2-ին, արտակարգ դեպք է տեղի ունեցել Երևանում։

Մոտ երեք ու կես ժամ Աջափնյակ վարչական շրջանի թիվ 38 մանկապարտեզի 4-ամյա տղա սանը մանկապարտեզի տարածքից, ըստ ծնողի հայտնածի, կորել էր։

Ինչպես տեղից հայտնում է ֆոտոլրագրող Գագիկ Շամշյանը, որոնողական աշխատանքներին մասնակցել են ծնողները, նրանց բարեկամները, մանկապարտեզի ողջ կոլեկտիվը, ինչպես նաև բազմաթիվ ծնողներ և ՀՀ ՆԳՆ ոստիկանության համայնքային ոստիկանության գլխավոր վարչության Մաշտոցի բաժնի ավելի քան 20 ծառայողներ՝ բաժնի պետ Դավիթ Ավագյանի և բաժնի պետի տեղակալ Գևորգ Պողոսյանի գլխավորությամբ։

Մոտ 1–2 կմ շառավղով իրականացված որոնումներից հետո երեխային հայտնաբերել են մոտ 3,5 ժամ անց՝ մանկապարտեզին հարակից տարածքում։

Երեխայի կյանքին ոչ մի վտանգ չի սպառնում։ Ֆոտոլրագրողի հետ զրույցում ծնողները, ովքեր հրաժարվեցին տեսախցիկի առաջ խոսել, իրենց շնորհակալությունն էին հայտնում մանկապարտեզի կոլեկտիվին, սրտացավ քաղաքացիներին և ոստիկանության Մաշտոցի բաժնի ծառայողներին։

Քիչ առաջ երեխան ծնողների ուղեկցությամբ ներկայացվեց ոստիկանության Մաշտոցի բաժին։

Տեսանյութը ստորև․