SHAMSHYAN.com-ը փետրվարի 24-ին ֆոտոռեպորտաժ, տեսանյութ էր հրապարակել Երևան քաղաքում տեղի ունեցած արտակարգ դեպքի մասին։ Այդ օրը՝ ժամը 06:30-ի սահմաններում Թումանյան փողոցում հրդեհ էր բռնկվել  «Mazda CX-5» մակնիշի ավտոմեքենայում, որը դարձել էր ոչ շահագործելի։

Դեպքի փաստով ՀՀ Ներքին գործերի նախարարության ոստիկանության համայնքային ոստիկանության գլխավոր վարչության Երևանի քննչական կենտրոնական բաժնում գույք ոչնչացնելու կամ վնասելու հատկանիշներով փաստաթղթեր էին կազմվել, որոնք փոխանցվել էին ՀՀ Քննչական կոմիտեի Երևան քաղաքի քննչական վարչության Կենտրոն և Նորք Մարաշ վարչական շրջանների 3-րդ քննչական բաժին։

Համայնքային ոստիկանները պարզել էին, որ Թումանյան փողոցի թիվ 9ա հասցեում կայանված նշված ավտոմեքենան պատկանել է նույն հասցեում բնակվող Տիգրան Մարգարյանին։

Ոստիկանները, ձեռնարկելով անհրաժեշտ միջոցառումներ, պարզել էին, որ ավտոմեքենան հրկիզել է նույն փողոցում բնակվող 54-ամյա Աշոտ Չալաբյանը, ով ըստ օպերատիվ տեղեկությունների փորձել է նշված ավտոմեքենայի դիմացի տարբերանշանը հափշտակել, սակայն կրակմարիչը գործի դնելուց հետո մեքենան հրդեհվել է։

Ֆոտոլրագրողի տեղեկություններով՝ արդեն տևական ժամանակ է քննչական բաժինը գիտի, թե ով և ինչ պայմաններում է Տ․ Մարգարյանի ավտոմեքենան հրկիզել, սակայն մինչև այժմ չգիտես ինչու գործը տեղում քնած է, իսկ կասկածյալը ինքնավստահ շարունակում է շրջել հանցանքի վայրում։ Թե ինչն է պատճառը, որ մինչև այժմ անգամ տուժածին չեն հայտնել կատարողի մասին, մարդկանց մոտ լուրջ կասկածներ են առաջանում։ Իսկ թե ով է վնասը վերականգնելու, դա էլ է օդից կախված։

SHAMSHYAN.com-ը ներկայացնում է տեսանյութ, թե ինչպես են կամ անզգուշաբար, կամ միտումնավոր հրկիզում ավտոմեքենան։

Ինչպես ավելի վաղ հայտնել էր SHAMSHYAN.com-ը, փետրվարի 24-ին արտակարգ դեպք էր տեղի ունեցել Երևանում։ Ժամը 06:30-ի սահմաններում դեռևս անհայտ հանգամանքներում հրդեհ էր բռնկվել Թումանյան փողոցի 9ա շենքի դիմաց կայանված «Mazda CX-5» մակնիշի ավտոմեքենայում։

Մինչ դեպքի վայր կժամանեին ՀՀ Ներքին գործերի նախարարության Փրկարար ծառայության Երևանի թիվ 8-րդ հրշեջ-փրկարարական ջոկատից 1 մարտական հաշվարկ, ավտոմեքենայի առջևում առաջացած կրակի տարածման դեմ պայքարել էին քաղաքացիներն ու ավտոմեքենայի սեփականատեր Տիգրան Մարգարյանը, ապա ժամանած հրշեջները նախ կանխել, ապա մարել էին կրակը։

Ըստ նախնական տեղեկությունների բարեբախտաբար տուժածներ չկային։

Դեպքի վայր էին  ժամանել նաև ՀՀ ՆԳՆ ոստիկանության պարեկային ծառայության Երևան քաղաքի գնդի 1-ին գումարտակի 2-րդ վաշտի պարեկները՝ գումարտակի հրամանատար Գոռ Առաքելյանի, գումարտակի հրամանատարի տեղակալ Դավիթ Նիկողոսյանի, վաշտի հրամանատար Հայկ Արոյանի գլխավորությամբ։

Տարածքը սահմանազատել էին նույն վաշտի պարեկներ Հովսեփ Հովհաննիսյանը ու Արև Տեր-Դավթյանը։

Դեպքի վայր էին ժամանել նաև ՀՀ ՆԳՆ ոստիկանության համայնքային ոստիկանության գլխավոր վարչության Կենտրոնական բաժնի հերթապահ խումբը օրվա պատասխանատու հերթապահի գլխավորությամբ։