Ի՞նչ էր տեղի ունեցել տրոլեյբուսի և կին ուղևորի միջև․ հարցի պատասխանը MediaHub-ը փորձեց ստանալ՝ կապ հաստատելով «Երևանի էլեկտրատրանսպորտ» ՓԲԸ տնօրեն Սարգիս Բեջանյանի հետ:

«Խնդիրը վճարելու հետ է կապված եղել, վարորդը խնդրել է վճարել, այդ կինն էլ 100 դրամանոց կոպեկը նետել է վարորդի վրա, ասել է՝ ստացի, վարորդն ասել է՝ բայց կանխիկ չի, հես են վալիդատորները, քարտով վճարեք, կինն էլ ասել է՝ ինչի՞ ավել վճարեմ, որ տանեք, լափե՞ք, ինչ-որ արտահայտություն է արել՝ վարորդի պատմելով։ Վարորդն էլ ասել է՝ ինչի՞ մասին ես խոսում, ո՞վ է լափում, որից հետո կինը շիշը նետել է վարորդի ուղղությամբ, ու եթե տեսնում եք, տեսանյութում վարորդը չի շարունակում վեճը»,- նշեց Բեջանյանը։

«Երևանի էլեկտրատրանսպորտ» ՓԲԸ տնօրենը նշեց՝ թե՛ տրոլեյբուսի, թե՛ ավտոբուսի վարորդները շատ համբերատար ամեն ինչ անում են, որ կոնֆլիկտ չլինի, փորձում են խնդրել, որ քաղաքացիները վճարեն։

MediaHub-ը հետաքրքրվեց նաև, թե ե՞րբ են փոխվելու հին տրոլեյբուսները, քանի որ որոշ ժամանակ առաջ հայտարարել էին, որ շուտով նոր տրոլեյբուսներ կլինեն քաղաքում, Բեջանյանն էլ պատասխանեց․ «Մոտավորապես մայիսի կեսին, մինչև մայիսի վերջ, կարծում եմ, նոր տրոլեյբուսներն ամբողջությամբ կլինեն, տեխնիկական աշխատանքներ կան կատարելու։ Տրոլեյբուսները երբ լինեն արդեն Երևանում, մի քանի օրից հները Երևան քաղաքում էլ չեն լինի։ 45 նոր տրոլեյբուս կլինի, հին 30 տրոլեյբուսները դուրս կգան, այսինքն՝ ևս 15 տրոլեյբուս ավելանում է Երևանում»։

Մարիաննա Արամյան