Նիկոլ Փաշինյանը հերթական ճեպազրույցներից մեկի ժամանակ հայտնել էր, որ մայիսի 28-ին՝ Հանրապետության օրվա առթիվ, Երևանի Հանրապետության հրապարակում տեղի կունենա վերջին տարիներին ձեռք բերված զինտեխնիկայի ցուցադրություն, ապա արդարացել, որ դա, ըստ էության, հաշվետվություն է լինելու, քանի որ «զորահանդես»-ը նուրբ երևույթ է և կարող է խաղաղության օրակարգից շեղվելու տպավորություն ստեղծել։
«Մենք այս թեմայով աշխատում ենք մեր միջազգային գործընկերների հետ։ Զորահանդեսը շատ նուրբ երևույթ է և կարող է նաև տպավորություն ստեղծի խաղաղության օրակարգից շեղվելու, խաղաղության օրակարգից հրաժարվելու, և մենք աշխատում ենք և շարունակելու ենք աշխատել միջազգային հանրության մեր գործընկերների հետ, ներառյալ՝ տարածաշրջանի երկրների հետ, որպեսզի նրանք որևէ կերպ դա չընկալեն որպես խաղաղության օրակարգից հրաժարում»,- պարզաբանել էր նա։
Պարզվում է՝ այս «հաշվետվությունը» կազմելու պարտականությունը դրվել է «Դոմինո Վիդեո Փրոդաքշն» ՍՊԸ-ի վրա, այն էլ՝ հրատապությամբ, առանց մրցույթի գնման կազմակերպմամբ։
Այսպես, նախ՝ ապրիլի 27-ին կնքված պայմանագրով, ապա նաև՝ մայիսի 8-ին կնքված համաձայնագրով այս ՍՊԸ-ն շուրջ 420 միլիոն դրամով (419,638,800 դրամ, 1 135.135. 135 դոլար) մայիսի 28-ին մատուցելու է միջոցառման կազմակերպման ծառայություններ։
Տեխնիկական բնութագրից մի քանի հատվածներ․ «Միջոցառումը նախատեսվում է անցկացնել Երևան քաղաքի Հանրապետության հրապարակում՝ որպես լայնամասշտաբ բացօթյա հանդիսավոր միջոցառում՝ ներառելով բեմական ներկայացում, զորահանդես և գեղարվեստական ներկայացումներ։
Միջոցառման նպատակը բարձր որակի, ժամանակակից տեխնիկական և գեղարվեստական լուծումներով համալրված լայնամասշտաբ և հանդիսավոր զորահանդես իրականացնելն է։ Միջոցառումը տեսանկարահանելու և եթեր է հեռարձակելու Հանրային հեռուստաընկերությունը։
Ընդհանուր հայեցակարգը մշակելիս անհրաժեշտ է հաշվի առնել միջոցառման թեմատիկ առանձնահատկությունն ու խորագիրը։ Միջոցառման բովանդակային նկարագրությունը, Միջոցառման կոնցեպտը պետք է ներառի պետության խորհրդանիշներ։ Ընդհանուր բեմահարթակի կառուցվածքը և ձևավորումը պետք է համապատասխանեն միջոցառման կոնցեպտին և էսքիզին։
Միջոցառման ժամանակ նախատեսվում է հատուկ էֆեկտների օգտագործում՝ ցերեկային եռագույն հրավառություն․ Հանրապետության հրապարակի 5 շենքերի տանիքներից յուրաքանչյուրի վրա նախատեսվում է տեղադրել 5 կարմիր, 5 կապույտ և 5 նարնջագույն հրավառություն` ընդհանուր՝ 15 հատ յուրաքանչյուր տանիքի համար, ընդհանուր քանակը՝ 75 հատ:
Նախատեսվում է «Հանրապետության օր» մեծ գրվածքի պատրաստում և տեղադրում, ՀՀ քարտեզի ռելիեֆային դեկորի պատրաստում, ՀՀ զինանշանի ռելիեֆային դեկորի պատրաստում»։
Ամուսնական «Դոմինո»-ի մասին՝ ավելի մանրամասն․
«Դոմինո փրոդաքշն» անունով ՍՊԸ-ն է, որին 168․am-ն անդրադարձել էր դեռ 2021 թվականի սեպտեմբերին, երբ հակառակ պատերազմում զոհվածների, գերեվարվածների և անհետ կորածների հարազատների բողոքի բազմաթիվ միջոցառումների՝ սգացող երկրում, փաշինյանական ձևակերպմամբ՝ Անկախության օրվան նվիրված «գունագեղ» միջոցառումն իրականություն դարձավ, պատկանում է Ռուզաննա Վարդանյանին։
«Դոմինո վիդեո փրոդքաշն»-ի 100 տոկոսն էլ պատկանում է Ռուզաննայի ամուսնուն՝ Աշոտ Առաքելյանին։
Ընդհանուր առմամբ, ամուսիններին պատկանող ՍՊԸ-ները, ըստ էլեկտրոնային գնումների համակարգի, 7 խոշոր գնմամբ են աչքի ընկել, որոնցից 5-ը՝ առանց մրցույթի եղանակով, մեկը՝ գնանշման հարցում ընթացակարգով, որը դարձյալ մրցույթ չի ենթադրում, և միայն մեկը՝ բաց մրցույթով․ այդ թվում՝
Երևանի քաղաքապետարանը 2025 թվականի հոկտեմբերին 34 800 000 միլիոնով պատվիրակել էր «Էրեբունի-Երևան» տոնակատարության շրջանակում միջոցառման կազմակերպում,
Առողջապահության նախարարությունը 2025 թվականի սեպտեմբերին պատվիրակել է Առողջության համապարփակ ապահովագրության հիմնադրամի ապրանքանիշի ձևավորման (բրենդինգ) ծառայությունը 32 միլիոն 760,000 դրամով,
ՀՀ բարձր տեխնոլոգիական արդյունաբերության նախարարությունը՝ մի դեպքում՝ 4 մլն 800,000 դրամի ներկայացուցչական ծախսեր, մեկ այլ դեպքում՝ 1 միլիոն 200,000 դրամի գովազդային ծառայություններ,
Վարչապետի աշխատակազմը 2025 թվականի հուլիսին «Մեր ժամանակների հերոսը» միջոցառման համար էլ հատկացրել է 130,569,600 դրամ։
Ի դեպ, Նիկոլ Փաշինյանն ու նրա թիմակից ՊՆ նախարար Սուրեն Պապիկյանը սոցիալական ցանցերի իրենց էջերում մայիսի 28-ին նախատեսված միջոցառումից կադրեր են հրապարակել, ու թեև Փաշինյանը մարտին շեշտել էր, որ նախատեսվող միջոցառումը ոչ թե դասական զորահանդես է, այլ յուրօրինակ «հաշվետվություն» Հայաստանի քաղաքացիներին, այսօր հրապարակված տեսանյութը նկարագրելիս՝ նա «զորահանդես» բառն է օգտագործել․ «Մայիսի 28-ի զորահանդեսի փորձ»։
Հավելենք՝ դեռ 2019 թվականին ն 168.am-ն Աշոտ Առաքելյանից գրավոր հարցմամբ հետաքրքրվել էր՝ որքա՞ն գումար է կառավարությունը հատկացրել ՀՀ անկախության 30-ամյակին նվիրված միջացառման համար, հաստատո՞ւմ են տեղեկությունները, թե պետական բյուջեից հատկացվելու է 1 մլրդ դրամ, ինչպե՞ս կմեկնաբանի այն պնդումները, թե մտերիմ հարաբերություններ ունի ԿԳՄՍ նախկին նախարար, այժմ՝ վարչապետի աշխատակազմի ղեկավար Արայիկ Հարությունյանի հետ, արդյոք «Դոմինո փրոդա՞քշն»-ն է նկարահանել «Քաղաքացիական պայմանագիր» կուսակցության նախընտրական քարոզչական հոլովակները և, մասնավորապես, Նիկոլ Փաշինյանի մասնակցությամբ քարոզչական տեսահոլովակը, արդյո՞ք իր ղեկավարած ընկերությունը սեփական նախաձեռնությամբ է իրականացնում ՀՀ հիմնի նոր տեսահոլովակի նկարահանումները, և, թե ինչ արձագանքներ ունի այն հավաստիացումներին, թե նոր տեսահոլովակից հանվում են Արցախի կադրերը:
Պատասխանները չէինք ստացել։
Հարցումից հետո հեռախոսազանգով «Դոմինո փրոդաքշն» կազմակերպության ղեկավարից ևս մեկ անգամ հետաքրքրվել էինք, թե ի՞նչ ծախսեր են արվել «գունագեղ» շոուի համար: Մեր հարցերը, սակայն, նյարդայնացրել էին նրան, և նա հորդորել էր այլևս չզանգահարել իր հեռախոսահամարին:
Նա սուտ էր որակել տեղեկությունները, թե դրոնների վարձակալության 10 րոպեն արժեցել է 110.000 ԱՄՆ դոլար, բայց նաև չներկայացրեց իրական թիվը: Առհասարակ միջոցառման ծախսերի մասին մեր հարցերը ևս մնացել էին անպատասխան։
Հիշեցնենք, որ ՀՀ կառավարությունն այս միջոցառման կազմակերպման համար ևս մրցույթ չէր հայտարարել:
#Մոտ #միլիոն #դրամ #մլն #դոլար #Դոմինո #Վիդեո #Փրոդաքշնին #սպասվող #զորահանդեսհաշվետվության #համար #պայմանագիր #առանց #մրցույթի
