Հայաստանը պաշտոնական խողովակներով գազի գնի թանկացման ազդակներ չի ստացել, հետևաբար, այդ հարցին առնչվող խոսակցությունները չափազանցված են։

«Արմենպրես»-ի հետ զրույցում այս մասին հայտնել է ՀՀ ՏԿԵ նախարար Դավիթ Խուդաթյանը՝ անդրադառնալով հասարակության ներսում պարբերաբար շրջանառվող գազի գնի հնարավոր բարձրացման հարցին։

««Գազպրոմ Արմենիա»-ի գործընկերների հետ մեր աշխատանքները բավականին լավ են ընթանում։ Ընթացիկ շահագործումների մասով կայուն գազամատակարարում ենք ունեցել նախորդ տարվա ընթացքում՝ չնայած եղանակային վայրիվերումներին։ Նաև ներդրումային ծրագրերի մասով ենք «Գազպրոմ Արմենիա»-ի գործընկերների հետ աշխատում։ Մեր աշխատանքի մեջ խնդրահարույց պրոբլեմներ չեմ տեսնում»,- ասել է ՏԿԵ նախարարը։

Անդրադառնալով այն հարցին, թե արդյո՞ք Հայաստանն ունի այլընտրանքային էներգետիկ ռեսուրսներ, որոնց շնորհիվ կկարողանա կոմպենսացնել գազի գնի թանկացումը, եթե նման բան տեղի ունենա, Խուդաթյանն ասել է.

«Անկախ էներգակիրների գնի թանկացումից՝ ցանկացած երկիր պետք է փորձի իր սեփական էներգետիկ ռեսուրսներն ապահովել։ Մեր դեպքում խոսքը վերաբերում է նախևառաջ արևային կայաններին։ Նախորդ տարի ՀՀ-ում արտադրվել է 10 միլիարդ կվ/ժ էներգիա, որից ավելի քան 1,6 միլիարդ կվ/ժ էներգիան արտադրվել է արևային կայանների միջոցով։ Թվերի խորությունը պատկերացնելու համար հավելեմ, որ Մեծամորի ատոմակայանն արտադրել է ընդհանուր արտադրանքի շուրջ 29 տոկոսը, և արդեն մեր արևային կայաններն արտադրում են Մեծամորի ատոմակայանի արտադրանքի շուրջ 60 տոկոսը, ինչը կարևոր է։ Նախորդ տարիներին արևային էներգետիկայի ոլորտի տարբեր հատվածներով ազատականացված շուկայում գործարքների թվի, մատակարարների քանակի առումով, ինչպես նաև տնային տնտեսություններում արևային կայանների տեղադրման քանակով ունեցել ենք կրկնակի աճ։ Նախորդ տարին փակել ենք 1100 մեգավատ դրվածքային հզորությամբ կայանների առկայությամբ, որոնց թիվն այս պահին ավելացել է ևս 100-ով»:

Նրա տեղեկացմամբ՝ ՀՀ կառավարության վերջին նիստերից մեկում հաստատվեց նաև օրենսդրությունը մշակելու հետ կապված հարցը, ուստի առաջիկայում ԱԺ-ին կներկայացվի կուտակիչ կայանների լիցենզավորման կարգին առնչվող նախագիծը։ Կուտակիչ կայանների լիցենզավորումն, ըստ Խուդաթյանի, հնարավորություն կտա նոր ներդրումներ ունենալ այդ կայանների կառուցման մասով։

«Կուտակիչ կայաններով հնարավոր կլինի արևային կայաններից ստացվող էլեկտրաէներգիան դարձնել հաստատուն գրաֆիկով էներգիա, ինչն ավելի կօգնի Հայաստանի տնտեսությանը։ Աշխատանքն այդ առումով կդառնա ավելի արդյունավետ։ Հիմա ցերեկային ժամերին ունենում ենք արևային էներգիայի արտադրանքի պիկ, հետևաբար ստիպված ենք լինում մեր հիմնական արտադրական հզորությունների դեպքում օրվա այդ ժամերին դրանց արտադրողականությունն իջեցնել, կամ առհասարակ հանել էներգետիկ համակարգից, մինչդեռ կուտակիչ կայանների գոյությունը մեզ հնարավորություն կտա հաստատուն գրաֆիկով օգտագործել արևային կայանների միջոցով արտադրված էլեկտրաէներգիան, ուստի մենք էլ փորձում ենք օրենսդրական կարգավորումներով նպաստել ոլորտի արագ զարգացմանը»,- ասել է Խուդաթյանը։