Հարավային Իտալիայում տեղի ունեցած առանձնակի դաժան սպանությունը ցնցել է հանրությանը և նոր ուշադրություն հրավիրել միգրանտ աշխատողների շահագործման խնդրի վրա։ Կալաբրիայի շրջանի Ամենդոլարա քաղաքում կայանված այրված միկրոավտոբուսում հայտնաբերվել են չորս միգրանտների մարմիններ։ Ըստ քննության տվյալների՝ զոհերը ողջ են եղել, երբ մեքենան հրկիզվել է։ Panorama.am-ի փոխանցմամբ, այս մասին հայտնում է Reuters-ը։

Տեսահսկման տեսախցիկների կադրերը ցույց են տալիս, թե ինչպես են երկու անձինք բենզին լցնում միկրոավտոբուսի վրա և այն հրկիզում՝ ներսում փակելով ուղևորներին։ Գործը քննող դատախազը լրագրողներին հայտնել է, որ իր 30-ամյա գործունեության ընթացքում երբեք նման դաժանության ականատես չի եղել։

Իտալիայի վարչապետ Ջորջիա Մելոնին դատապարտել է կատարվածը՝ այն որակելով «սարսափելի սպանություն»։ Նրա խոսքով՝ անհրաժեշտ է ամբողջությամբ բացահայտել դեպքի հանգամանքները և պատասխանատվության ենթարկել բոլոր մեղավորներին։

Դեպքից միակ փրկվածը՝ Թաջ Մոհամմադ Ալամյարը, պատմել է, որ ինքը և մյուս աշխատողները տուն էին վերադառնում ելակ հավաքելու մեկօրյա աշխատանքից հետո։ Նրա խոսքով՝ նրանց տեղափոխում էին երկու պակիստանցի հանցախմբի ղեկավարներ, որոնք կանգ են առել բենզալցակայանում, սակայն վառելիք լցնելու փոխարեն բենզին են լցրել մեքենայի վրա և հրկիզել այն։

Նա հայտնել է, որ իրեն հաջողվել է փախչել բեռնախցիկի միջոցով, մինչ մյուսները մնացել են ներսում։ «Մենք սկսեցինք գոռալ, սակայն նրանք բացեցին հետևի դուռը և ներս նետեցին կրակայրիչը։ Մի ակնթարթում ամեն ինչ վերածվեց դժոխքի»,- պատմել է նա իտալական մամուլին։

Կալաբրիայի տարածաշրջանի ղեկավարը նշել է, որ այս ողբերգությունը լուրջ հարցեր է առաջացնում միգրացիայի, մարդկային արժանապատվության և խոցելի խմբերի նկատմամբ հասարակության պատասխանատվության վերաբերյալ։

Հետաքննության շրջանակում ձերբակալվել են երկու օտարերկրյա քաղաքացիներ, որոնք կասկածվում են առանձնակի ծանրացուցիչ հանգամանքներում սպանություն կատարելու մեջ։ Նրանց ինքնությունը դեռևս չի հրապարակվել։

Ըստ փրկված աշխատողի՝ զոհվածներից երեքը Աֆղանստանի, իսկ մեկը՝ Պակիստանի քաղաքացի էր։ Նա նաև հայտնել է, որ աշխատողները վեճի մեջ էին մտել իրենց գործատուների հետ աշխատավարձի պատճառով։ Նրանց խոստացվել էր օրական 45 եվրո վարձատրություն ութ ժամ աշխատանքի դիմաց, սակայն ապրիլի 20-ից հետո որևէ վճարում չէին ստացել։

Իտալիայում միգրանտ աշխատողների շահագործումը շարունակում է մնալ լուրջ խնդիր։ Վերլուծական կենտրոնների տվյալներով՝ գյուղատնտեսության ոլորտում աշխատողների զգալի մասը շարունակում է աշխատել ոչ պաշտոնական պայմաններով, ինչը նրանց դարձնում է հատկապես խոցելի շահագործման և բռնության նկատմամբ։