Ազգային ժողովի նախագահ Ալեն Սիմոնյանը ընտրատեղամաս է գնացել դստեր ուղեկցությամբ։ «Ես ընտրության եմ եկել, որպեսզի իմ աղջիկը և բոլոր երեխաները կարողանան ապրել ազատ, ապահով ու հարուստ երկրում»,-Երևանի 9-ի 21-րդ ընտրատեղամասում քաղաքացիական իր պարտքը կատարելուց հետո լրագրողներին ասել է Սիմոնյանը։ Նա բացառել է հետընտրական որևէ զարգացում, նշել, որ քարոզարշավի ընթացքից շատ գոհ է մնացել։ Թույլ չեն տալու քաղաքական որևէ ուժ ընտրողների քվեն ստանա կեղծումների ու կաշառքի միջոցով:

ԱԺ նախագահ Ալեն Սիմոնյանը վստահ է, որ ընտրություններից հետո քաղաքական լարվածություն կամ բողոքի ակցիաներ չեն լինի։ Նրա խոսքով՝ ընդդիմությունը չունի բավարար հանրային աջակցություն և արդեն գիտակցում է իր պարտությունը։

Լրագրողների հետ զրույցում Սիմոնյանը պնդել է, որ որոշ քաղաքական ուժեր փորձում են ընտրակաշառքի միջոցով ազդեցություն ունենալ ընտրությունների արդյունքների վրա։

ԱԺ նախագահի խոսքով՝ ընտրակաշառքի դեպքերի նկատմամբ իրավապահների արձագանքը խիստ է լինելու։

«Այդ կապիկներին՝ կապիկների համար նախատեսված վանդակներում ենք պահելու, իրենք գնալու են վանդակ հենց ընտրություններից հետո։ Օրենսդրական նախաձեռնություններն արդեն շրջանառության մեջ են դրված․ ընտրակաշառք տալու և բաժանելու համար նախատեսված պատժաչափերը խստացվելու են։ Այնպես որ, թող շատ վախենան»,- հայտարարել է Սիմոնյանը։

Անդրադառնալով հնարավոր հետընտրական գործընթացներին՝ ԱԺ նախագահը բացառել է նման զարգացումները։

«Բացառում եմ։ Եթե ընտրությունները ազատ և արդար են, ինչպես 2018 թվականից սկսած տեղի են ունենում, անկախ նրանից, թե ով է հաղթում, նման բան չի կարող լինել։ Դա անհնար է»,- նշել է նա։

Սիմոնյանի գնահատմամբ՝ ընդդիմությունն արդեն հասկանում է ընտրությունների հավանական արդյունքները, սակայն շարունակում է խոսել հետընտրական զարգացումների մասին։

«Ես պնդում եմ, որ ընդդիմությունը չի կարող հանրահավաք անել։ «Ուժեղ Հայաստանը», «Բարգավաճ Հայաստանը», «Հայաստան» դաշինքը, նույնիսկ եթե միավորվեն, չեն կարող լուրջ հանրահավաք կազմակերպել»,- ասել է ԱԺ նախագահը։

Նրա խոսքով՝ Հայաստանի քաղաքացիները գիտակցված ընտրություն են կատարում, և ընտրությունների արդյունքները չեն կարող կասկածի տակ դրվել հետընտրական սցենարների միջոցով։