ՀՀ բանակն այսօր ոչ թե պատերազմի, այլ խաղաղության գործոն է։ Այս մասին այսօր Հայաստանի Առաջին Հանրապետության օրվան նվիրված զորահանդի ժամանակ հայտարարեց ՀՀ վարչապետ Նիկոլ Փաշինյանը։

Ըստ վարչապետ Նիկոլ Փաշինյանի՝ Հայաստանի բանակն այսօր ներկայանում է նոր սպառազինությամբ ու ռազմական տեխնիկայով, նոր համազգեստով, նոր գաղափարախոսությամբ, նոր զինանշանով, ինչպես նաև նոր հոգեբանական և մարտական պատրաստվածությամբ։

Նրա խոսքով՝ Հայաստանի ռազմատեխնիկական համագործակցության ընդլայնված աշխարհագրությունը «Իրական Հայաստանի» գաղափարախոսության հիման վրա իրականացվող քաղաքականության արդյունքն է։ Փաշինյանն այս մասին հայտարարեց Հանրապետության հրապարակում անցկացվող զորահանդեսից առաջ։

Վարչապետը հիշեցրեց, որ 2022 թվականի հոկտեմբերի 6-ին Պրահայում Հայաստանի և Ադրբեջանի միջև ձեռք բերված պայմանավորվածությունից հետո, երբ կողմերը 1991 թվականի Ալմա-Աթայի հռչակագրի հիման վրա ճանաչեցին միմյանց տարածքային ամբողջականությունը, Հայաստանի համար բացվեցին սպառազինությունների միջազգային շուկաները։

«Այսօրվա զորահանդեսի ընթացքում կներկայացվի շուրջ յոթ երկրի արտադրության սպառազինություն և ռազմական տեխնիկա»,- նշեց Փաշինյանը։

Նա ընդգծեց նաև, որ զորահանդեսի կարևոր բաղադրիչներից մեկը Հայաստանում արտադրված ռազմական տեխնիկան և սպառազինությունն է, որը, վարչապետի գնահատմամբ, արդեն սկսում է իր դիրքը ձևավորել միջազգային շուկայում։

Փաշինյանի խոսքով՝ Հայաստանը քաղել է բանակի պատմության դասերը, և այսօր արդեն տեսանելի են այդ աշխատանքի գործնական արդյունքները։